Si, pasó Tisha ta yama ayó. Djasabra 15 di desèmber Teatro KadaKen ta presentá e último presentashon di Tisha, 8or di anochi den La Tentashon na Otrobanda.

E anochi akí ta speshal tambe pasó Teatro KadaKen ta dediká e presentashon di Tisha akí na Sr. Norman de Palm, kende na fin di e aña akí lo retirá komo direktor di Teatro Luna Blou. Esaki ta nos manera pa mustra nos apresio na Sr. de Palm pa e trabou ku e la hasi dies aña largu pa teater di Kòrsou.

For di mart te ku aworakí mas di 7000 hende a mira e obra akí. E gira di Tisha na Aruba den òktober pasá tambe tabata eksitoso. I awor a yega ora pa yama ayó.

E obra Tisha ta konta e historia di un mucha muhé di dieskuater aña ku tin soñonan grandi ku e kier logra den su bida. E ke studia. Biaha. Bira algu grandi den bida. Pero e ta hañ’é konfrontá ku un famia ku a disidí p’e kaba kon su bida ta bai kana. Pero Tisha no ke. I sigur e no ke sali na estado ku su diessinku aña, manera a pasa ku su mama, su mama su mama, su mama su mama su mama, i su mama su mama su mama su mama. E ke kibra e tradishon di famia akí. E ke kana su propio kaminda. E úniko hende ku ta pará den su kaminda ta su Wela. I Tisha tin ku tuma un desishon ku por kost’é e relashon ku su famia.

Tisha ta trata temanan manera: disidí over di bo propio destino, amor, embaraso, teenage pregnancy, tradishon, etc.

Dirigí pa Silvia Andringa, Skirbí pa Albert Schoobaar. Aktornan ta: Norma Cova. Zjairon Minguel, Ruënna Mercelina i Albert Schoobaar

Lider komersial ta Lou Nisbet. Lider Artístiko ta Albert Schoobaar. Asistente di produkshon ta Giangela Noor.

Pa nos di Teatro KadaKen e obra akí ta un logro grandi ku nos a realisá ku sosten i apoyo di diferente instansha i persona.

P’esei un danki ta bai tambe na: Fonds Podiumkunsten i Stichting Doen di Hulanda, Prins Bernhard Cultuurfonds Caribisch Gebied i Rotary Club Willemstad, Tele Curaçao.

Un danki tambe ta bai na CEMBRAH (Comishon Embarasao Hubenil) di Aruba, tambe di Kòrsou Don Andres NV i Curaçao Port Services.

TISHA. Djasabra 15 di desèmber, 8or di anochi. Den La Tentashon. Entrada 20 florin, karchi optenibel na takiya di Teatro Luna Blou.